На Астравеччыне кандыдат у дэпутаты Варнянскага сельскага савету, грамадска-палітычны актывіст Мікалай Уласевіч змагаецца з парушэннем яго правоў як удзельніка выбарчай кампаніі. Пятага лютага ён накіраваў дзве скаргі: адну – ў Варнянскую сельскую выбарчую камісію, другую – у суд Астравецкага раёна.  Першая скарга датычылася таго, што інфармацыйны матэрыял, надрукаваны камісіяй пра яго як пра кандыдата ў дэпутаты, у два разы саступае па аб’ёме аналагічнаму матэрыялу пра яго суперніка па акрузе. Да таго ж, гэтая інфармацыя, па меркаванні самаго Уласевіча, няпоўная. Напрыклад, у матэрыяле адсутнічаюць звесткі пра тое, што ён раней неаднаразова абіраўся дэпутатам сельскага і раённага Саветаў. 

Мікалай Уласевіч. Фота з Facebook

Першы варыянт інфармацыйнай улёткі пра Мікалая Уласевіча і ўлётка яго суперніка Юрыя Пярко

Іншую скаргу Мікалай Уласевіч падаў у раённы суд, і датычылася яна дзеянняў рэдакцыі дзяржаўнай раённай газеты “Астравецкая праўда”. Справа ў тым, што галоўная рэдактарка газеты Ніна Рыбік адмовілася апублікаваць перадвыбарчую праграму кандыдата ў дэпутаты. У адказ на ліст Уласевіча, у якім ён прасіў размясціць праграму нават за аплату, рэдактарка паведаміла, што Выбарчы кодэкс не прадугледжвае магчымасці… бясплатнай публікацыі перадвыбарчых праграмаў. Далей, без усялякай аргументацыі, у адказе сцвярджаецца, што праграма Мікалая Уласевіча нібыта парушае патрабаванні Выбарчага кодэксу, і таму яму адмоўлена ў публікацыі. 

Рэакцыя на скаргі была хуткая. Так, у той жа дзень сельская выбарчая камісія адказала, што прыняла ўсе прапановы кандыдата і запрасіла Уласевічу прыйсці да іх, каб ўзгадніць новыя матэрыялы. Калі кандыдат прыйшоў на ўзгадненне, то, па яго словах, усё было добра да таго моманту, пакуль ён не зрабіў яшчэ адну прапанову – каб камісія суправадзіла новы інфармацыйны матэрыял зваротам да выбаршчыкаў, у якім яна мусіла прызнаць ранейшы распаўсюджаны варыянт несапраўдным і, адпаведна, прынесці свае прабачэнні. На што камісія не змагла даць дакладны адказ, спасылаючыся на адсутнасць на працоўным месцы старшыні.

Што датычыцца скаргі ў раённы суд па “Астравецкай праўдзе”, то суддзя Аляксандр Дзямешчык паведаміў Уласевічу, што яго скарга непадведамная суду. Каб вырашыць пытанне з непублікацыяй яго праграмы ў газеце суд прапанаваў кандыдату звяртацца ў адпаведную выбарчую камісію. Сам Мікалай Уласевіч плануе з гэтай нагоды накіраваць зварот у Цэнтральную выбарчую камісію.

"Праваабаронцы за свабодныя выбары"

Крыніца: Астравеччына: кандыдат ад АГП абскарджвае няроўныя ўмовы перадвыбарчай кампаніі