З прычыны няправільнай мапы выбарчых акругаў і двухсэнсоўнасці апісання іх межаў двух апазіцыйных прэтэндэнтаў не зарэгістравалі кандыдатамі ў дэпутаты. Першы намеснік БСДП (Грамада) Ігар Барысаў і актывіст аргкамітэту партыі БСДП (Народная грамада) Станіслаў Паўлінковіч абвінавацілі гарадскую выбарчую камісію ў тым, што яна ўвяла іх у зман.
Падчас рэгістрацыі кандыдатаў 17 студзеня старшыня гарвыбаркама Алена Бальшакова паведаміла, што абодва вылучэнцы сабралі подпісы не па сваіх акругах. Пазней Ігар Барысаў выявіў, што на мапе, якая знаходзіцца ў памяшканні камісіі, няправільна пазначаныя межы ягонай Фацінскай акругі №26. Праз тры дні пра гэта ж заявіў Станіслаў Паўлінковіч, які вылучаўся па Арлоўскай акрузе №11. Праз тры дні пра гэта ж заявіў Станіслаў Паўлінковіч, які вылучаўся па Арлоўскай акрузе №11.
- Ігар Барысаў. Фота mspring.online
Абодва падалі скаргі ў абласную выбарчую камісію. Аднак, як распавёў Барысаў сайту mspring.online, сэнсу ў гэтым няшмат:
– Пакуль мне яшчэ не прыйшоў афіцыйны адказ. Але, зыходзячы з размовы, мой ліст у аблвыбаркам разгледзелі не як скаргу, а як зварот грамадзяніна. Уся справа ў тым, што я папрасіў прызнаць, што межы акругі былі пазначаныя з памылкамі, а подпісы – сапраўднымі, але не папрасіў аб перарэгістрацыі. Так што зарэгістраваны як кандыдат я не буду, – паведаміў палітык.
На яго думку, праблема з пазначэннем акругаў становіцца хранічнай. Каб пераадолець яе, неабходна мяняць выбарчае заканадаўства.
- Мапа Фацінскай выбарчай акругі №26 у Магілёве
– Наша партыя БСДП (Грамада) выступіць з прапановай прадстаўляць, акрамя тэкставага абазначэння межаў акругаў, яшчэ і графічны малюнак. Уся справа ў тым, што тая мапа, якую я сфатаграфаваў у гарвыбаркаме, па сутнасці ніякімі дакументамі не рэгулюецца. Гэта проста мапа горада, на якой маркерам сябры камісіі абвялі акругі. Паколькі гэта неафіцыйна, прыцягнуць гарвыбаркам да адказнасці вельмі цяжка. А калі арыентавацца на тэкставае апісанне межаў акругаў, то там таксама вельмі лёгка памыліцца, паколькі ёсць вельмі шмат двухсэнсоўных момантаў. Юрыст ЦВК, з якой я гэта абмяркоўваў па тэлефоне, са мною пагадзілася, – сказаў Барысаў.
У падобную пастку трапіў актывіст Станіслаў Паўлінковіч. Камісія таксама прызнала, што ініцыятыўная група вылучэнца збірала подпісы не па ягонай акрузе і адмовіла ў рэгістрацыі. Праз некалькі дзён палітык вырашыў пераправерыць дадзеныя і ўбачыў, што згодна з мапай з гарвыбаркама ён зрабіў усё правільна.
– Усе подпісы я збіраў у месцах, пазначаных на сайце гарвыканкама і на мапе, якую я сфатаграфаваў у камісіі. Сябры магілёўскай гарадской выбарчай камісіі, такім чынам, здзейснілі неправамерныя дзеянні ў адносінах да мяне і сябраў маёй ініцыятыўнай групы – увялі нас у зман. Для чаго гэта было зроблена – зразумела. Па маёй акрузе балатаваліся выключна праўладныя кандыдаты, а тут, бачыш, апазіцыянер уклініўся і ўсю карціну ім, не дай божа, сапсуе, – заявіў Паўлінковіч.
- Мапа Арлоўскай выбарчай акругі №11 у Магілёве
Як і Барысаў, ён накіраваў скаргу ў абласную выбарчую камісію. Аднак ён прапусціў трохдзённы тэрмін, які даецца на абскарджанне рашэння гарадской камісіі. Нягледзячы на гэта, па яго словах, у аблвыбаркаме яму паабяцалі, што адказ дашлюць.
Назіральнік ад “Магілёўскага праваабарончага цэнтра” пры гарадской выбарчай камісіі Аляксандр Буракоў асцярожны з ацэнкамі. На яго думку, гарвыбаркам сапраўды падставіў кандыдатаў, вывесіўшы ў сябе ў няслушную мапу.
– Я не думаю, што вылучэнцаў спецыяльна сабатавалі. З іншага боку, вывешваць такую мапу ў памяшканні выбарчай камісіі і рабіць выгляд, што там усё правільна, а потым разводзіць рукамі і казаць пра неафіцыйны статус некарэктна і непрафесійна, як мне здаецца. Камісія, па словах начальніка арганізацыйна-кадравай работы гарвыканкама Міхаіла Свірыдзенкі, фармавалася ў тым ліку на аснове вопыту і прафесіяналізму людзей, якія ў яе ўвайшлі. Аднак двух чалавек не зарэгістравалі, таму што сябры камісіі не змаглі правільна абвесці межы акругаў, – пракаментаваў сітуацыю Буракоў.
“Праваабаронцы за свабодныя выбары”
Крыніца: Магілёў: памылка ў мапе акругаў паўплывала на выбары ў гарадскі Савет дэпутатаў