Раніцай 14 траўня каля Дому правасуддзя сабралася шмат людзей, якія прыйшлі на суд па так званай "справе студэнтаў". Аднак нават у будынак суда пускалі толькі блізкіх сваякоў і дзяржаўныя СМІ. Нават бабуль і дзядуляў абвінвачаных не пусцілі ў залю суда нібыта праз недахоп месцаў.
Справу разглядае суддзя суда Савецкага раёна Марына Фёдарава. Усіх палітзняволеных вінавацяць па ч. 2 арт. 17 ("злачынства, здейсненая групай асобаў па папярэдняй змове") і ч. 1 арт. 342 Крымінальнага кодэкса ("актыўны ўдзел у групавых дзеяннях, што груба парушаюць грамадскі парадак"), ім пагражае да трох гадоў пазбаўлення волі.
Следства вінаваціць затрыманых у тым, што яны нібыта каардынавалі пратэсты на месцах, вялі тэматычныя тэлеграм-каналы, асабіста заклікалі да ўдзелу ў акцыях пратэсту, выраблялі і распаўсюджвалі ўлёткі з заклікамі, кіравалі ўдзельнікамі, займаліся іхным рыхтаваннем і матэрыяльным забеспячэннем, паведамлялі пра перасоўванне супрацоўнікаў органаў унутраных справаў. Паводле следчых, пратэставыя акцыі зрывалі адукацыйны працэс і нармальную працу ВНУ, бо моладзь блакавала калідоры, ускладняла праход студэнтаў, выкладчыкаў і наведнікаў, гучна крычала, свістала, скандавала лозунгі, спявала.
Каго судзяць?
Па крымінальнай справе праходзяць 12 чалавек:
- Ксенія Сырамалот, студэнтка БДУ,
- Ягор Канецкі, студэнт БДУ,
- Ілля Трахтэнберг, студэнт БДУ,
- Таццяна Якельчык, студэнтка БДУ,
- Кася Будько, студэнтка БДПУ,
- Яна Арабейка, студэнтка БДПУ,
- Вікторыя Гранкоўская, студэнтка БНТУ,
- Настасся Булыбенка, студэнтка БНТУ,
- Марыя Каленія, студэнтка БДАМ,
- Глеб Фіцнер, студэнт МДЛУ,
- Алана Гебрэмарыям, выпускніца БДМУ, прадстаўніца Святланы Ціханоўскай у справе моладзі і студэнтаў, уваходіць у Каардынацыйны савет,
- Волга Філатчанкава, выкладчыца БДУІР.
Большасць з абвінавачаных былі затрыманыя 12 лістапада, у іх кватэрах правялі ператрусы, а студэнтаў змясцілі ў СІЗА КДБ.
Усіх фігурантаў справы беларускія праваабаронцы прызналі палітычнымі вязнямі.
Затрыманні каля суда
Супрацоўнікі АМАП, якія дзяжурылі каля будынку суда, пачалі затрымліваць некаторых студэнтаў з тых, хто прыйшоў падтрымаць абвінавачаных, але не патрапіў на працэс. Вядома, што было затрымана не менш за шэсць чалавек. Сярод затрыманых - палітык Анатоль Лябедзька.
Інфармацыя будзе дапаўняцца
Крыніца: Суд па "справе студэнтаў": у залю пусцілі толькі родных, некаторых з групы падтрымкі - затрымалі