Генеральны сакратар ААН Антоніу Гутэрыш заклікаў улады Беларусі спыніць ужываць сілу супраць мірных дэманстрантаў, расследаваць паведамленні аб катаваннях затрыманых і пачаць шырокі інклюзіўны дыялог, паведамляецца на афіцыйным сайце арганізацыі. У заяве, з якой у пятніцу ад імя кіраўніка ААН выступіў ягоны прэс-сакратар, гаворыцца, што сітуацыя ў Беларусі выклікае ў яго глыбокую трывогу.  Яго асабліва турбуюць бесперапынныя сілавыя дзеянні супраць мірных пратэстоўцаў і затрымання людзей, якія ажыццяўляюць свае законныя дэмакратычныя правы. Гутэрыш таксама занепакоены паведамленнямі аб выкарыстанні тактыкі запалохвання супраць прадстаўнікоў грамадзянскай супольнасці, СМІ і апазіцыі.  

Генеральны сакратар ААН Антоніу Гутэрыш

"Генеральны сакратар заклікае ўлады ўстрымацца ад прымянення сілы супраць тых, хто ўдзельнічае ў мірных сходах, і дамагчыся таго, каб абвінавачванні ў катаваннях і жорсткім абыходжанні з затрыманымі былі цалкам расследаваныя...", - заявіў прэс-сакратар Антоніу Гутэрыша. 

Кіраўнік ААН падкрэсліў, што "цяперашні крызіс могуць пераадолець толькі самі беларусы шляхам шырокага інклюзіўнага дыялогу". Ён перакананы, што ў інтарэсах стабільнасці гэты дыялог трэба пачаць неадкладна. 

У ААН асудзілі прымяненне сілы супраць дэманстрантаў у Беларусі і заклікалі ўлады спыніць катаванні і вызваліць усіх затрыманых.

Генеральны сакратар з самага пачатку пратэстаў не раз звяртаўся да ўладаў Беларусі з заклікам спыніць катаванні затрыманых. З аналагічнай заявай выступіла і Вярхоўны камісар ААН па правах чалавека Мішэль Бачэлет, а таксама Камітэт ААН па правах чалавека.

Крыніца: Кіраўнік ААН: Улады Беларусі павінны спыніць сілавыя дзеянні супраць удзельнікаў пратэстаў