Больш за 60 міжнародных праваабарончых, адвакацкіх і юрыдычных арганізацый падпісалі адкрытую заяву ў сувязі з затрыманнем беларускіх адвакатаў Іллі Салея і Максіма Знака.
Прадстаўнікі шырокага сектара грамадскіх арганізацый больш за дваццаці краін свету выказваюць глыбокае абурэнне затрыманнем 9 верасня 2020 года ў Беларусі адвакатаў Іллі Салея і Максіма Знака ў рамках палітычна-матываванай крымінальнай справы і лічаць гэта грубым умяшальніцтвам у магчымасць свабоднага і бесперашкоднага ажыццяўлення іх прафесійнай юрыдычнай дзейнасці і права на выказванне адвакатамі свайго прафесійнага меркавання, гарантаваных міжнародна-прававымі стандартамі. Дадзеная сітуацыя з'яўляецца прамым следствам мноства праблем і парушэнняў у галіне ажыццяўлення права на абарону і функцыянавання адвакатуры ў цэлым у Рэспубліцы Беларусь, на якія ўжо не раз звярталі ўвагу як міжнародныя арганізацыі, так і прадстаўнікі адвакацкай супольнасці.
Яны патрабуюць ад уладаў Рэспублікі Беларусь:
- неадкладнага вызвалення адвакатаў Максіма Знака і Іллі Салея і захавання міжнародна-прававых гарантый незалежнасці адвакацкай дзейнасці і рэалізацыі права на абарону;
- спынення пераследу юрыстаў і адвакатаў, якія, рэалізуючы канстытуцыйнае права на свабоднае выказванне меркаванняў і перакананняў, выказваюць сваё меркаванне ў рамках прафесійнай дзейнасці;
- няўхільнага захавання палажэння арт. 62 Канстытуцыі Рэспублікі Беларусь: «кожны мае права для ажыццяўлення і абароны правоў і свабод, у тым ліку права карыстацца ў любы момант дапамогай адвакатаў і іншых сваіх прадстаўнікоў у судзе, іншых дзяржаўных органах, органах мясцовага кіравання, на прадпрыемствах, ва ўстановах, арганізацыях, грамадскіх аб'яднаннях і ў адносінах са службовымі асобамі і грамадзянамі.
Поўны тэкст Адкрытай заявы на рускай мове:
Вызваліць Іллю Салея і Максіма Знака, спыніць пераслед юрыстаў і адвакатаў!
Крыніца: Вызваліць Іллю Салея і Максіма Знака, спыніць пераслед юрыстаў і адвакатаў!