06.11.2024 Тэгі: праваабаронцы, правы чалавека Дванаццаць найбуйнейшых праваабарончых арганізацый выступілі з адкрытым лістом аб падтрымцы перадачы Літвой у Офіс пракурора Міжнароднага крымінальнага суда сітуацыі, звязанай са злачынствамі супраць чалавечнасці, здзейсненымі вышэйшым кіраўніцтвам рэжыму Лукашэнкі, піша Сусветная арганізацыя супраць катаванняў (OMCT). Яны заклікаюць дзяржавы-удзельніцы МКС далучыцца да звароту Літвы з просьбай аб расследаванні такіх злачынстваў.
- Ілюстрацыйнае фота
Праваабаронцы адзначаюць, што ў адпаведнасці з мандатамі пададуць доказы ды інфармацыю, сабраную ў падтрымку папярэдняга расследавання, у Офіс Пракурора МКС і дзяржавам-удзельніцам МКС, а таксама пацвярджаюць сваю гатоўнасць аказваць падтрымку ў дачыненні да падобных расследаванняў.
Праваабаронцы заклікаюць дзяржавы-ўдзельніцы МКС разгледзець усе даступныя захады для прыцягнення да адказнасці за злачынствы, учыненыя Лукашэнкам і яго саўдзельнікамі, сярод якіх адвольныя затрыманні, палітычна матываваныя пераследы, несправядлівыя судовыя працэсы, незаконныя забойствы, сексуалізаваны гвалт, катаванні, прымусовая праца і гвалтоўныя знікненні.
У Міжнародны суд у Гаазе перададзеныя матэрыялы па злачынствах рэжыму Лукашэнкі
Яны заклікаюць дзяржавы праводзіць нацыянальныя расследаванні і пераследы згодна з прынцыпамі ўніверсальнай юрысдыкцыі, каб прыцягнуць да адказнасці ўсіх вінаватых у злачынствах, учыненых Лукашэнкам і яго саўдзельнікамі.
Адкрыты ліст да дзяржаў-удзельніц МКС аб падтрымцы звароту Літвы падпісалі арганізацыі:
- DIGNITY – Дацкі інстытут супраць катаванняў,
- Праваабарончы цэнтр "Вясна",
- Еўрапейскі цэнтр па канстытуцыйных і правах чалавека (ECCHR),
- Міжнародная федэрацыя за правы чалавека (FIDH),
- Human Constanta,
- Міжнародная платформа па прыцягненні вінаватых да адказнасці па Беларусі (IAPB),
- Інстытут правоў чалавека Міжнароднай асацыяцыі юрыстаў (IBAHRI),
- Міжнародны камітэт па расследаванні катаванняў у Беларусі,
- Міжнароднае партнёрства за правы чалавека (IPHR),
- Міжнародная рада па рэабілітацыі ахвяр катаванняў (IRCT),
- Нарвежскі Хельсінкскі Камітэт,
- Сусветная Арганізацыя супраць катаванняў (OMCT),
- REDRESS.