Друкаваць гэтую старонку
Пятніца, 29 Студзень 2021

Блогерку Алену Янушкоўскую кінулі за краты на 7 сутак

Ацаніць гэты матэрыял
(2 галасоў)
Алена Янушкоўская па вызваленні з ІЧУ. Чэрвень, 2020 Алена Янушкоўская па вызваленні з ІЧУ. Чэрвень, 2020

Суд Віцебскага раёну 29 студзеня прызнаў блогерку Алену Янушкоўскую вінаватай ва ўдзеле ў несанкцыянаваным пікетаванні (ч.3 арт. 23.34 КаАП) і пакараў яе адміністрацыйным арыштам на 7 сутак. Такое рашэнне прыняў суддзя Міхаіл Зубеня. Янушкоўская мае інваліднасць трэцяй групы, яна знаходзіцца за кратамі віцебскага ІЧУ ад 27 студзеня.

8 студзеня 2021 году блогерка Алена Янушкоўская, вядомая сваімі стрымамі на канале «Настоящая Беларусь», узяла ўдзел у сяброўскай гулянцы ў кавярні «Сава» пад Віцебскам. Там жа зняла троххвілінны відэаролік, на якім сябры віншуюць адзін аднога і ўсю Беларусь з Новым годам і Калядамі. Відэа віншавання пабачыў на ютуб-канале старшыня Варонаўскага сельсавету Восіпаў – і адразу ж паведаміў у міліцыю…

Янушкоўскую затрымалі 27 студзеня і пасля складання пратаколу паводле ч.3 арт. 23.34 КаАП кінулі ў ізалятар часовага ўтрымання (ІЧУ) – у судовым працэсе яна ўдзельнічала праз скайп.

Паводле міліцэйскага пратаколу, Алена Янушкоўская 8 студзеня ўзяла ўдзел у несанкцыянаваным пікетаванні, удзельнікі якога выкрыквалі лозунгі «Жыве Беларусь!», «Лукашэнку ў аўтазак!» ды іншыя. Сваёй віны жанчына не прызнала і тлумачэнні даваць адмовілася.

«Ваш закон пазбаўляе мяне права на выказванне ўласнай думкі нават на прыватнай тэрыторыі», – сказала толькі.

Суддзя Міхаіл Зубеня, які дзень таму за ўдзел у той жа вечарыне аштрафаваў на 40 базавых велічынь дачку Алены Янушкоўскай Юлію Ўласенку, прызнаў вінаватай і яе маці – і пастанавіў пакараць яе адміністрацыйным арыштам на 7 сутак (двое сутак Алена ўжо адбыла).

Алене Янушкоўскай 55 гадоў, яна мае інваліднасць трэцяй групы.

Зміцер Міраш