На лаве падсудных апынуліся чацьвёра абвінавачаных, адзін зь якіх – былы міліцыянт са Шклова Максім Іваноў. Паводле матэрыялаў сьледзтва, абвінавачаныя “ўваходзілі ў арганізаваную групу, якой кіравала нявызначаная асоба”. Ад лістапада 2018-га да пачатку лютага 2019 году займаліся купляй, захоўваньнем, перавозкай і распаўсюдам наркатычных сродкаў. Усе чацьвёра былі затрыманыя ў лютым 2019 году. Аднаго з дылераў затрымалі пры перавозцы партыі псыхатропаў коштам каля 8 тыс. даляраў.
Для ключавых фігурантаў справы пракурор прасіў 16 гадоў зьняволеньня.
«Для мяне гэта было як квэст»
У апошнім слове на судзе Іваноў не прызнаў свой удзел у арганізаванай групоўцы, але пагадзіўся з тым, што ўчыніў злачынства. Былы супрацоўнік МУС зьвярнуў увагу суду на тое, што ягоная злачынная дзейнасьць цягнулася ўсяго адзін-два дні. У сувязі з гэтым прасіў суд прызначыць пакараньне, сувымернае сваёй віне.
«16 гадоў – гэта тое самае, што пахаваць жыўцом», – казаў абвінавачаны.
Яшчэ адзін абвінавачаны Міхаіл Ліпатаў у апошнім слове тлумачыў, што праз недахоп жыцьцёвага досьведу ён не ўсьведамляў усёй небясьпекі і наступстваў сваёй дзейнасьці.
«Для мяне гэта была як гульня, як нейкі квэст, я проста выконваў атрыманае заданьне. Усіх гэтых людзей, якіх абвінавачваюць разам са мной, я ня ведаў і ніколі іх не сустракаў», – сказаў Ліпатаў.
Амаль 40 гадоў на чацьвярых
Прысуд 12 лістапада ў судзе Першамайскага раёну Віцебску абвясьціла судзьдзя Тацяна Родзіна.
Максім Іваноў прызнаны вінаватым у незаконным набыцьці, захоўваньні і перавозцы асабліва небясьпечных псыхатропных рэчываў у складзе арганізаванай злачыннай групоўкі (ч. 4, арт. 328 КК). Суд пакараў яго пазбаўленьнем волі на 13 гадоў, пазбавіў таксама званьня старэйшага лейтэнанта міліцыі.
На такі самы тэрмін – 13 гадоў зьняволеньня – прысуджаны яшчэ адзін фігурант справы Дзяніс Пазыніч. Міхаіл Ліпатаў атрымаў 10 гадоў турмы.
Чацьвёрты падсудны – 26-гадовы Андрэй Міначкін – абвінавачваўся па ч.1 і ч.3 арт. 328 і атрымаў 3 гады пазбаўленьня волі. Згодна з законам “Аб амністыі” яму скасавалі 1 год і прызначылі канчатковае пакараньне ў выглядзе пазбаўленьня волі на 2 гады ў папраўчай калёніі агульнага рэжыму ва ўмовах пасяленьня. У зале суду Міначкін быў узяты пад варту.
Прысуд не набыў законнай моцы і можа быць абскарджаны.
С. Горкі