Ірына нарадзілася 17 студзеня  1963 года ў мястэчку Старыя Дорогі Мінскай вобласці. Скончыла мінскі тэхналагічны каледж па спецыяльнасці "Дыхайнер жаночага адзення".  Да гэтай працы ў яе быў сапраўдны талент - яна ўмела шыць незвычайныя жаночыя ўборы - сукенкі, касцюмы паліто. І ўсе гэта яна ўмела насіць, не баючыся яркіх колераў і нестандартных фасонаў.

З гэтым уменнем у руках яна і распачала ўласную справу - стала прыватнай прадпрымальніцай, адкрыла невялікую майстэрню.  Увогуле, што  заўсёды вылучала гэтую жанчыну - дык гэта прага дзейнасці і самаўдасканалення. Ужо пасля 50-ці, калі ў  Ірыны з’явілася ўласнае аўто, яна  стала заўзятым кіроўцам. Вельмі любіла сваё лецішча, пра якое ці не штодня пісала ў сацсетках, і ўвогуле яна шмат пісала пра сябе, распавядаючы, як штодзенныя маленькія радасці могуць дадаваць сапраўднай асалоды ў жыцці. Заўсёды  ганарылася поспехамі сваёй унучкі, з вялікай цеплынёй заўжды казала пра сваіх сына і дачку...

Віцебск страціў яшчэ адну неабыякавую, смелую асобу, якая імкнулася пастаяць за сябе і за іншых, не баючыся касых позіркаў і асуджальных размоваў. Менавіта такой  мы і  запомнім Ірыну, і менавіта такой яе нам усім цяпер будзе вельмі бракаваць. Выказваем самыя шчырыя спачуванні ўсім сябрам, блізкім і родным  Ірыны Аляксандраўны Яскевіч.

Павел Леанідаў