Сяржук Доўгушаў нарадзіўся ў вёсцы  Новае Тарчылава ў Аршанскім раёне. У 2010 годзе скончыў Беларускую дзяржаўную акадэмію музыкі  і стаў салістам Белдзяржфілармоніі. У 2018 годзе атрымаў стыпендыю Міністэрства культуры Польшчы Gaude Polonia і паўгода жыў у Варшаве, вывучаючы колавую ліру пад кіраўніцтвам прафесара Пятра Дахліга. У 2020–2021 гадах вучыўся ў магістратуры Нацыянальнай акадэміі навук Беларусі, дзе напісаў магістарскую працу пра колавую ліру ў гісторыі Беларусі. З гэтага даследавання вырасла кніга «Ліра і лірніцтва ў беларускай культуры».

Ён грае больш чым на 20 народных духавых інструментах і на колавай ліры, піша музыку, папулярызуе беларускі фальклор – выдае кнігі і стварае спеўныя гурты ў замежжы. З лекцыяй-канцэртам пра беларускую народную культуру ён аб’ехаў штаты ЗША, Канаду і еўрапейскія сталіцы.

У жніўні 2022 года Сяржук Доўгушаў заснаваў у Варшаве арт-рэзідэнцыю «Дом творцаў» — праект, накіраваны на псіхалагічную рэабілітацыю і творчую падтрымку беларускіх дзеячаў культуры і мастацтва. Напрыканцы 2025 года ў Варшаве ён адкрыў яшчэ і шэлтар для вызваленых палітвязняў. 9 лістапада Доўгушаў паведаміў пра закрыццё абодвух праектаў, патлумачыўшы, што яго не стае на іх падтрыманне і што ён хоча больш часу прысвячаць сабе і сям’і.

Максім Дубіна