Амаль тры тыдні ў Беларусі ішло актыўнае абмеркаванне і вылучэнне кандыдатур на гэтае зборышча. Сваіх прадстаўнікоў вылучылі так званыя мясцовыя Саветы дэпутатаў, Саюз жанчын і Федэрацыя прафсаюзаў, ветэранскія арганізацыі, БРСМ, праўладнае грамадскае аб'яднанне "Белая Русь".

Сярод кандыдатаў у дэлегаты так званага УНС ёсць і прадстаўнікі Браслаўскага раёна. Ад раённага Савета дэпутатаў – Алена Мацеша, дэпутат ад Вайнюнскай выбарчай акругі № 19, урач агульнай практыкі, загадчык Опсаўскай амбулаторыі, ад Мяжанскага сельскага Савета дэпутатаў – Жана Акула, старшыня мясцовага сельсавета, ад Ахрэмаўскага сельскага Савета дэпутатаў – Зінаіда Махнач, - памочніца лекара па амбулаторна-паліклінічнай дапамозе Ахрэмаўскай амбулаторыі агульнай практыкі, ад Відзаўскага сельскага Савета дэпутатаў – Жана Хадзюш, агент страхавога прадстаўніцтва Белдзяржстраху па Браслаўскім раёне, ад Далёкаўскага сельскага Савета дэпутатаў – Алена Куляшова, загадчыца Далёкаўскага клуба-бібліятэкі.

Ад праўладнай грамадскай арганізацыі "Белая Русь" на абласной канферэнцыі вылучана Алена Гірон, дырэктарка ДУА "Браслаўская гімназія".

Ян Дудкін