Другога жніўня ў судзе Жлобіна і Жлобінскага раёну вынесеныя прысуды 22-гадоваму Яну Стацэнку і 27-гадоваму Андрэю Пархамовічу. Іх прызналі вінаватымі паводле ч.1 арт.342 Крымінальнага кодэкса. Суддзя Ерафееў вынес наступныя пакаранні: прызначыў Яну Стацэнку два гады пазбаўлення волі ў калоніі агульнага рэжыму, а Андрэю Пархамовічу – два гады абмежавання волі без накіравання ў ПУАТ – "хатняй хіміі". Менавіта такое пакаранне запрасіў пракурор Панчанка.
Стацэнка ўзяты пад варту ў залі суда. Да суда мера стрымання Стацэнкі была падпіска аб нявыездзе і асабістае паручальніцтва, Пархамовіча – асабістае паручальніцтва.
Мужчын асудзілі па падзеях за 9 жніўня 2020 года, за якія ў Жлобіне ўжо судзілі людзей: падставай для следства сталі апублікаваныя фота і відэа з акцыі. Згодна з абвінавачаннем, яны прынялі ўдзел у масавых мерапрыемствах, якія былі спалучаныя з відавочным непадпарадкаваннем прадстаўнікам улады, перашкаджалі руху транспарту.
Абодва фігуранты справы настойвалі, што былі незнаёмыя між сабой. Абодва абвінавачаныя прызналі віну.
У Жлобіне адбываецца чарговы суд па падзеях 9 жніўня
Ян Стацэнка ў апошнім слове раскаяўся і папрасіў прызначыць пакаранне, не звязанае з пазбаўленнем волі.
"У першую чаргу я хацеў бы выбачыцца перад грамадствам, – сказаў у апошнім слове Андрэй Пархамовіч. – Я раскайваюся ў тым, што адбылося. Я хацеў бы папрасіць самае мяккае пакаранне, бо я планую завесці сям'ю, а таксама працаваць у гэтай краіне і заставацца законапаслухмяным грамадзянінам".
Ян Стацэнка нарадзіўся 4 красавіка 1999 года. Мае станоўчыя характарыстыкі, да верасня 2020 года працаваў на БМЗ. Зараз жыве і працуе ў Гомелі. 21 красавіка яго затрымалі на суткі, пасля завялі крымінальную справу.
Андрэй Пархамовіч нарадзіўся 15 лютага 1994 года. Працуе на БМЗ. Быў затрыманы 25 жніўня, трое сутак правёў у жлобінскім ІЧУ.
Крыніца: Жлобінцам працягваюць выносіць прысуды па падзеях 9 жніўня