Сябра Праваабарончага цэнтра “Вясна” і юрыст прафсаюза РЭП Аляксандр Вайцешык на выходных быў затрыманы міліцыяй Нясвіжскага РАУС за спробу прайсці на сход у якасці даверанай асобы былога работніка агракамбіната “Сноў” пенсіянера Вячаслава Сырыцы. Пра гэта паведаміла "Радыё Рацыя".

На гэтым сходзе вырашалі пытанне пазбаўлення Сырыцы звання ганаровага работніка агракамбіната і выключэнне з агракамбіната, кажа сябра Праваабарончага цэнтра “Вясна” Сяргей Гоўша:

"Паколькі Сырыца з’яўляецца сябрам незалежнага прафсаюза, ён хацеў правесці з сабою на гэты сход давераную асобу – юрыста прафсаюза РЭП Аляксандра Вайцешыка".

Аляксандр Вайцешык абсалютна карэктна даказваў, што мае права прысутнічаць на сходзе і паказваў даверанасць. Але і дружыннікі, і міліцыя сцяной сталі ў дзвярах залы, кажа прысутны пры гэтым актывіст Мікалай Чарнавус:

"Дружыннік сказаў, што ён штурхаў яго, цялесных пашкоджанняў няма, маўляў, прарываўся Вайцешык у залу, дзе ідзе пасяджэнне. Насамрэч паседжання яшчэ не было".

На месцы быў складзены пратакол за хуліганства. Праваабаронцу завезлі ў Нясвіжскі РАУС, дзе яму стала кепска. На дадзены момант ён знаходзіцца ў Нясвіжскай бальніцы. Суд прызначаны на 26 лютага.

 Навіны ад Spring96.org у Telegram. Падпішыся на наш канал https://t.me/viasna96 

Крыніца: У Нясвіжы на выходных затрымалі праваабаронцу "Вясны"