24 студзеня ў судзе Маскоўскага раёна г. Мінска прайшло чарговае судовае пасяджэнне па артыкуле 23.34 КаАП (парушэнне парадку правядзення несанкцыянаванага масавага мерапрыемства) у дачыненні да актывісткі “Моладзевага блока” Аланы Гебрэмарыям. 
Нагадаем, што папярэднее пасяджэнне было перанесена з прычыны таго, што суддзя Таццяна Мотыль адправіла справу на дапрацоўку ў РУУС Маскоўскага раёна. Тады Алана прадставіла доказы, што яна не знаходзілася на акцыі ў той дзень і час, што былі пазначаны ў пратаколе.
Зараз пратакол змянілі: цяпер Алану вінавацяць у тым, што яна прымала актыўны ўдзел у несанкцыянаваным масавым мерапрыемстве 20 снежня з 18.30 па 19.10 гадзін.
Алана адразу заявіла адвод суддзі:
“Я ўжо казала на мінулым судзе, што ёсць факты парушэння правоў грамадзян праз прысуджаныя ім суткі і штрафы, [якія рабіла суддзя Мотыль]”.
Адвод суддзя не задаволіла.
“Шмат каго яшчэ судзілі за абарону суверэнітэта Радзімы…”
“Давайце па сутнасці, — перабіла суддзя. — Вы прымалі ўдзел у акцыі?”
“Так, але неактыўна [як было пазначана ў пратаколе]. Я не выкрыквала лозунгі, не шла са сцягам — я проста шла. І я не разумею, чаму я як грамадзянка Беларусі не магу прайсціся па вуліцах горада…”
Алана падкрэсліла, што не лічыць сябе вінаватай у парушэнні заканадаўства. Яна спаслалася на Канстытуцыю РБ (якая з’яўляецца вышэйшым юрыдычным дакументам) і на артыкул 35, дзе гаворыцца аб свабодзе сходаў і мітынгаў.
“Прапаную спыніць гэтае злачынства, — адзначыла Алана. — Бо тое, што рабілі грамадзяне на акцыях—гэта не злачынства, бо яны выйшлі на мірны сход, як гэта могуць рабіць людзі ўсіх дэмакратычных краін свету. А сапраўднае злачынства робяць тыя, хто спускае гэтыя пратаколы”
Сведкі Межон і Сенько (супрацоўнікі АМАПу) на пасzджэнне не з’явіліся “у сувязі са службовай занятасцю”, але іх пратаколы зачыталі. У абодвух яны аднолькавыя: “падчас акцыі ішоў у складзе калоны з мэтай аховы парадку і бачыў Гебрэмарыям”.
У якасці доказаў да матэрыялаў справы быў далучаны відэазапіс са стрыму “Радыё Свабода”, дзе Алана давала інтэрв’ю падчас акцыі.
Пасля разгляду матэрыялаў справы суддзя зрабіла перапынак, каб вынесці рашэнне.
Вынік — 30 базавых велічынь штрафу.
Крыніца: "Злачынства робяць тыя, хто спускае гэтыя пратаколы". Як прайшоў суд на Гебрэмарыям