Кандыдатка ў дэпутаты па Чкалаўскай выбарчай акрузе № 96 Аксана Юшкевіч звярнулася са скаргай у Назіральны савет пры Цэнтральнай выбарчай камісіі. Прычынай яе звароту паслужыў нявыхад выступу кандыдаткі у эфір “Радыё Мінск” раніцай 22 кастрычніка. Галоўны рэдактар радыёпраграмы В. Маліноўскі адзначыў, што выступ кандыдаткі ўтрымлівае заклікі да зрыву выбараў.

Таксама Аксана Юшкевіч выступала на тэлебачанні – для тэлеканала “Беларусь-3”, аднак у кандыдаткі ёсць падазрэнні, што і гэты яе выступ не будзе выпушчаны ў эфір. Таму яна сама запісала свой зварот да выбаршчыкаў і выклала яго ў сацыяльных сетках.

“Праваабаронцы за свабодныя выбары” прааналізавалі словы кандыдаткі і прамых заклікаў да байкоту ці зрыву выбараў не адшукалі.

Аднак, сярод выразаў кандыдаткі былі і такія, якія ўжо прыводзілі да забароны відэавыступаў Уладзіміра Няпомняшчых і Ірыны Давідовіч.

А менавіта:

“Не верце дыктатару і яго памагатым, яны хлусяць, ім пляваць на вас”.

“Калгаснай дыктатуры - баста! Астравецкай АЭС – баста!”

Аксана Юшкевіч таксама адзначае, што яе даверанай асобе Ірыне Халіп забаранілі выступаць на тэлебачанні і радыё ад яе асобы

Нагадаем, артыкулам 47 Выбарчага кодэкса забароненыя прапаганда вайны, заклікі да гвалтоўнай змены канстытуцыйнага ладу, парушэння тэрытарыяльнай цэласнасці краіны, абразы і паклёп у дачыненні да службовых асобаў, кандыдатаў у дэпутаты або прэзідэнты. Таксама не дапускаюцца заклікі да зрыву, адмене або пераносу ўжо прызначаных выбараў. Забароненая агітацыя ці прапаганда перавагі - расавай, сацыяльнай, моўнай і гэтак далей; гэтак жа, як распаўсюджванне матэрыялаў, якія могуць спараджаць такую ​​варожасць.

"Праваабаронцы за свабодныя выбары"

Навіны кампаніі ў фэйсбуку, твітэры і на Тэлеграм-канале

Крыніца: Што не спадабалася ў выступе Аксаны Юшкевіч, які знялі з эфіру