20 жніўня судовая калегія па грамадзянскіх справах Гомельскага абласнога суда адмяніла пастановы Хойніцкага РАУС і раённага суда аб высылцы з Беларусі на 10 гадоў 40-гадовага грамадзяніна РФ Сяргея Рэзчыка, паведамляе "Гомельская Вясна".
Сяргей Рэзчык нарадзіўся ў Хойніках, у 90-х пражываючы ў РФ аўтаматычна набыў расійскае грамадзянства. Пасля ён вярнуўся на Радзіму, стварыў сям'ю, выхоўвае дваіх непаўналетніх дзяцей. Жонка і дзеці з'яўляюцца беларусамі. Ва ўласнасці Сяргей мае кватэру ў Хойніках, мае стабільную працу і стабільны даход.
У красавіку 2019 года Хойніцкі РАУС прыняў рашэнне аб дэпартацыі Сяргея з Беларусі на максімальна магчымы тэрмін 10 гадоў - за адміністрацыйныя правапарушэнні. Мужчына дапусціў кіраванне аўтамабілем у стане алкагольнага ап'янення. Акрамя гэтага, ён прыцягваўся да адказнасці за перавозку ў аўтамабілі дзіцяці без дзіцячага крэсла, а таксама за пераход вуліцы ў неўсталяваным месцы. Гэтыя правапарушэння і сталі падставай для такой жорсткай санкцыі, як высылка з краіны.
Сяргей Рэзчык звярнуўся па юрыдычную дапамогу ў Гомельскае прадстаўніцтва Праваабарончага цэнтру "Вясна". Сумесна з незалежным прафсаюзам РЭП праваабаронцы падрыхтавалі скаргу ў Гомельскі абласны суд.
Праваабаронца Леанід Судаленка, які прадстаўляў у абласным судзе інтарэсы Рэзчыка, вынікам судовай цяжбы застаўся задаволены.
«Рашэнне аб высылцы пастаянна замежных грамадзян, пражываюць у нас, ужываецца без уліку інтарэсаў іх сем'яў і інтарэсаў непаўналетніх дзяцей. Акрамя таго, вельмі непрыемна чуць ад людзей у мантыях суддзяў пытанні, чаму высылаць не бярэ беларускага грамадзянства. Падкрэсліваю, грамадзянства, як і рэлігію, кожны чалавек выбірае для сябе самастойна. Трэба паважаць гэты выбар!», - заявіў пасля праваабаронца.
Ён таксама адзначыў, што гэта не першая перамога праваабаронцаў у справах аб высылкі замежных грамадзян. 7 лютага Гомельскі абласны суд адмяніў рашэнне аб высылцы з Беларусі 40-гадовага грамадзяніна Ўкраіны Сяргея Працэнка, які пражывае ў Буда-Кашалёве.
Нагадаем, 8 жніўня апеляцыйная інстанцыя Гомельскага абласнога суда пакінула ў сіле рашэнне суда Буда-Кашалёўскага раёна аб высылцы жыхара аграгарадка Губічы Уладзіміра Траутера. Расіяніна, які мае від на жыхарства, выслалі з краіны на пяць гадоў у інтарэсах грамадскага парадку. Таксама ў абласным судзе знаходзіцца скарга 66-гадовага грамадзяніна Украіны Уладзіміра Ландара, якога дэпартавалі з краіны за парушэнні парадку знаходжання замежных грамадзян на тэрыторыі Беларусі.
Навіны ад Spring96.org у Telegram. Падпішыся на наш канал https://t.me/viasna96
Крыніца: Гомельскі абласны суд адмяніў рашэнне аб высылцы грамадзяніна Расіі