Разгляд адміністрацыйнай справы, заведзенай на Алену Радзькову паводле ч.3 арт. 23.34, адбыўся ў судзе Наваполацку. Разьбірала справу судзьдзя Зінаіда Балаболава. На паседжаньні прысутнічаў таксама супрацоўнік МУС Рэпнік, які складаў пратакол на актывістку. Як мяркуе Радзькова, сваімі дзеяньнямі гэты міліцыянт умешваўся ў выбарчы працэс і чыніў на яе – як на сябра ініцыятыўнай групы – ціск. Пра гэта актывістка ўжо паведаміла ў пракуратуру.
Паводле міліцэйскага пратаколу, Алена Радзькова ўзяла ўдзел у несанкцыянаваным пікетаваньні з выкарыстаньнем плякатаў «Не забудзе Беларусь парад-2020!», «Слуга, сыходзь – народ прыйшоў!» ды выявы перакрэсьленага прусака.
Па словах Радзьковай, міліцыянт Рэпнік так і ня змог адказаць на пытаньне, якое ж дачыненьне яна мела да тых плякатаў з надпісамі і наагул да несанкцыянаванага пікетаваньня. Актывістка расказвае, што судзьдзя Балаболава да апошняга моманту паводзіла сябе так, быццам добра разумее жанчыну і верыць, што яна ні пры чым. Вельмі пільна вывучыла пасьведчаньне Радзьковай, якое дазваляе ёй зьбіраць подпісы за Чэрачня…
«Але што ў выніку? Балаболава дастала свой чароўны нататнік, адкрыла яго і прачытала рашэньне: 30 базавых велічынь штрафу! Усё! Ну што я магу сказаць? Жахліва, брыдка і абсалютна ні за што!» – лічыць Алена Радзькова.
Нагадаем, што гэта ня першы штраф, прысуджаны Алены Радзьковай паводле арт. 23.34 (парушэньне заканадаўства аб масавых мерапрыемствах). 22 траўня яе аштрафавалі на 8 базавых велічынь за ўдзел у сустрэчы з блогерам Сяргеем Ціханоўскім.
Зьміцер Міраш
Камэнтуйце гэтую навіну на нашай старонцы ў facebook!