Справу разглядала судзьдзя Алена Цыганкова.
Як расказала «Віцебскай Вясьне» Дар’я (абвінавачаная папрасіла не называць прозьвішча), на судзе ў якасьці доказу яе вінаватасьці паказалі відэа, на якім яна моўчкі стаіць сярод іншых людзей. У нейкі момант да дзяўчыны падышоў хлопец, каб пазнаёміцца, – яны перакінуліся фразамі.
«Ну глядзіце, вы ж размаўлялі!» – ажывілася судзьдзя… Карацей, няма словаў! Я лічу, што на мяне чыніцца ціск», – кажа Дар’я.
Судзьдзя Алена Цыганкова палічыла дзяўчыну вінаватай ва ўдзеле ў несанкцыянаваным пікетаваньні і аштрафавала на 20 базавых велічынь (540 рублёў).
Дар’я прызналася, што была вельмі зьдзіўленая тым, што яе адразу аштрафавалі, а ня вынесьлі папярэджаньне, бо да адміністрацыйнай адказнасьці яна прыцягвалася першы раз у жыцьці.
Паведаміла таксама, што ў дачыненьні да яе міліцыянты склалі яшчэ адзін пратакол за правапарушэньне, прадугледжанае арт. 23.34 КаАП, – гэтым разам за ўдзел у стрыме блогера Ціханоўскага 30 красавіка каля піраміды «Марка-сіці».
Суд адбудзецца 25 траўня.
Зьміцер Міраш
Камэнтуйце гэтую навіну на нашай старонцы ў facebook!