У сувязі з абвяшчэньнем Сусьветнай арганізацыяй аховы здароўя пандэміі каронавірусу праваабаронца Павал Левінаў пісьмова зьвярнуўся ў Віцебскі абласны суд з просьбай даць яму «поўную, праўдзівую і своечасовую інфармацыю» аб тым, якія захады робіць кіраўніцтва для захаваньня жыцьця і здароўя ўдзельнікаў працэсаў і супрацоўнікаў судоў.
Левінаву адказаў першы намесьнік старшыні Віцебскага абласнога суду Анатоль Фаменка. Ён сьцьвярджае, што судом «прымаюцца ўсе магчымыя меры засьцеражэньня з выкарыстаньнем сродкаў гігіены і дэзінфэкцыі».
«Апроч таго, юрыдычна зацікаўленым у выніках справы асобам прапануецца браць удзел у разглядзе справаў дыстанцыйна», – паведамляе Фаменка.
«Наведнікам рэкамэндавана, калі магчыма, устрымацца ад наведваньня памяшканьняў судоў, для накіраваньня скаргаў і зваротаў выкарыстоўваць паштовыя адпраўленьні і электронную пошту», – дадае ў адказе.
Яшчэ ў 2017 годзе на афіцыйным сайце Вярхоўнага суду паведамлялася, што «ў Беларусі ўсе суды абласнога зьвяна маюць абсталяваньне для правядзеньня дыстанцыйных судовых паседжаньняў». Паводле дадзеных, толькі ў 2016 годзе было праведзена 1000 дыстанцыйных працэсаў.
У лютым 2020 году першы намесьнік старшыні Вярхоўнага суду Валеры Калінковіч паведаміў падчас прэс-канфэрэнцыі, што да восені ўсе суды абласнога зьвяна будуць абсталяваныя сучаснымі сыстэмамі аўдыёвідэафіксацыі судовых працэсаў. Прыкладна ў гэтыя ж тэрміны плянуецца пачаць вопытную эксплёатацыю новай адзінай інфармацыйнай сыстэмы, якая мае зьвесьці да мінімуму папяровы дакумэнтазварот і пашырыць магчымасьці дыстанцыйнага звароту ў суд.
Зьміцер Міраш