У Полацку 19 чэрвеня сышоў у вечнасць юрыст-праваабаронца Юрый Бельскі. Яму было 57 гадоў. Юрый быў сузаснавальнікам Полацкага праваабарончага таварыства, доўгі час кіраваў полацкім аддзелам абароны правоў спажыўцоў.

12 траўня Полацкі суд вынес тры пастановы паводле артыкулу 24.23 КаАП за нібыта ўдзел грамадзян у несанкцыянаваных масавых мерапрыемствах. У выніку – два арышты і адзін штраф у памеры больш за 2000 рублёў.

Праз сайт мясцовага выканкаму Полацкі аддзел унутраных спраў заклікаў грамадзян, якія пражываюць на тэрыторыі садовых таварыстваў, па магчымасці арганізаваць вартавую ахову лецішчаў. Аддзел міліцыі абгрунтоўвае сваю просьбу тым, што ўдзел уладальнікаў дач у ахове дапаможа забяспечыць маёмасную бяспеку садаводчых таварыстваў, а таксама ўладальнікаў дачных домаўладанняў.

Полацкі суд 18 і 19 лютага «суткамі» і штрафамі пакараў семярых жыхароў гораду за тое, што яны нібыта фатаграфаваліся на фоне бел-чырвона-белага сцяга. Чацвёра палачан атрымалі вялікія штрафы, трое прысуджаныя да арыштаў.

Штонядзелю ў Полацку адбываюцца экскурсіі для жыхароў і гасцей гораду. Аднак цяпер экскурсантаў суправаджае група супрацоўнікаў МУС. І не толькі суправаджае – здымае ўдзельнікаў экскурсіі на відэакамеры ды перапісвае іх асабістыя дадзеныя.

У судзе Полацку і Полацкага раёну 21 снежня на 270 рублёў аштрафавалі прафсаюзнага лідара Віктара Стукава – за тое, што размясціў «палотнішча бел-чырвона-белага колеру» на балконе. Мужчыну затрымалі 17 снежня і пратрымалі ў ІЧУ 72 гадзіны, абвінаваціўшы ў правядзенні адзіночнага пікетавання (ч.1 арт. 23.34 КаАП).

У судзе Полацку 3 снежня аштрафавалі на 25 базавых велічынь жыхарку гораду Нэлі Алфёраву. Міліцыянты абвінавацілі жанчыну ў непадпарадкаванні супрацоўнікам МУС і іх абразе (арт. 23.4 і 23.5 КаАП) у дзень афіцыйнага адкрыцця адрамантаванага моста ў Полацку 6 лістапада. Па сведчаннях аднаго з відавочцаў, жанчыну затрымлівалі жорстка.

У Полацкім судзе 4 лістапада намеснік старшыні суду Уладзімір Бясецкі пакараў на 7 сутак адміністрацыйнага арышту Генадзя Бердзянёва за ўдзел у масавым мерапрыемстве 25 кастрычніка. Генадзь сцвярджаў на судзе, што «выказваў сваё меркаванне індывідуальна, пратэстуючы супраць затрымання мірных грамадзян».

Суд Полацкага раёну і гораду Полацку 8 верасня прысудзіў штраф у памеры 5 базавых велічынь Генадзю Бердзянёву. Гэтак палачаніна пакаралі за ўдзел у шэсці па горадзе 30 жніўня. Напярэдадні былі пакараныя яшчэ двое ўдзельнікаў гэтага шэсця.

У траўні 2020 году ў Полацку пачаў працаваць цэнтар прававой дапамогі для сацыяльна ўразьлівых грамадзян. Дзейнасьць цэнтру «Адвакацыя» накіраваная на прававую асьвету людзей і дапамогу ў абароне правоў і свабод чалавека. Людзям, якія знаходзяцца ў сацыяльна ўразьлівым становішчы, адмыслоўцы цэнтру дапамагаюць бясплатна.