Прычын зрыву тэрмінаў уводу ў эксплёатацыю абсталяваньня па вытворчасьці пліт у ААТ “Віцебскдрэў” і нявыхаду яго на праектную магутнасьць (сакавік 2014 году) мноства. У першую чаргу, гэта негатоўнасьць будаўнічай пляцоўкі для мантажу абсталяваньня і няякаснае выкананьне мантажных работ, якое пацягнула ўзьнікненьне аварыйных сытуацыяў. Прадпрыемствам на працягу шасьці месяцаў не прымаюцца дзейсныя меры па наладцы выцяжной вэнтыляцыі на ўчастку прэсаваньня, ня выяўленыя прычыны і не названыя вінаватыя ў тым, што яна дагэтуль не працуе.

Нагадаем, што ў студзені губэрнатар Віцебскай вобласьці Аляксандар Косінец адзначыў, што завод пабудаваны, але ёсьць праблемы. Гэта, у прыватнасьці, нізкая эфэктыўнасьць вэнтыляцыйнай сыстэмы фармовачнага прэсу. У выніку ўзровень фармальдэгіду ў цэху на цяперашні момант у два разы перавышае дапушчальную канцэнтрацыю, таму там магчыма знаходзіцца толькі ў рэсьпіратарах. «Працуем разам з праектантамі, каб палепшыць вэнтыляцыйную сыстэму», - сказаў губэрнатар. Менавіта з-за перавышэньня ўзроўню фармальдэгіду не адбыўся візыт кіраўніка дзяржавы на прадпрыемства.

У той самы час ААТ “Віцебскдрэў” абвясьціў аб рэалізацыі пліты МДФ, вырабленай у працэсе пуска-наладачных работ на новай вытворчасьці. Фармат пліты 2440×1830, таўшчыня 15-17 мм, кляс фармальдэгіду E1, шчыльнасьць 700-720 кг/м³.

Крыніца: Народныя навіны Віцебска