Жыхары дому № 24 па праспэкце Будаўнікоў выступаюць супраць будаўніцтва ў двары гандлёва-забаўляльнага цэнтру. Паводле слоў Эдуарда, аднаго з жыхароў дому, будаўніцтва праходзіць з парушэньнямі: будаўнічая пляцоўка пад цэнтар захоплівае паркоўку, дарожкі да прыпынкаў і дзіцячую пляцоўку.

Жыхарка Віцебску прадала супрацоўнікам падатковай 28 кіляграмаў клубніцаў. Яны спачатку сумленна заплацілі 400 тысяч, а потым запатрабавалі ад прадаўца бясплатна аддаць ім астатнія 1,2 тоны ягад, электронныя шалі і машыну коштам амаль 5 тысяч даляраў.

У Віцебску адбылася сустрэча з гендэрнымі экспэртамі і аўтарамі рэсурснага пакету «Гендэрны лікбез» і відэа «Сукенка». Мерапрыемства, якое ладзілі Алена Міньчэня і Вольга Петруковіч, сабрала каля 20 гасьцей. Трэнэры ў рамках жывой дыскусіі распавялі, што гендэрная роўнасьць - гэта ня толькі пытаньне пра роўнасьць мужчын і жанчын. Пытаньне роўнасьці і роўных магчымасьцяў значна шырэйшае.

Надыход каляндарнага лета моладзь Віцебску адзначыла флэш-мобам «Мокрыя войны», падчас якога змагалася ў гарадзкіх фантанах. Акцыя была арганізаваная праз сацыяльную сетку «УКантакце», дзе на адмысловую сустрэчу запісаліся больш за 700 чалавек, праўда толькі палова зь іх як стопрацэнтныя ўдзельнікі. Флэшмоб працягваўся паўгадзіны, а затым мокрую моладзь, якая весялілася, разагналі байцы палка міліцыі спэцыяльнага прызначэньня, якія прыбылі да фантанаў на двух аўтамабілях.

З 31 траўня па 2 чэрвеня ў Віцебску праходзіць габрэйская міжнародная адукацыйна-культурна-забаўляльная канфэрэнцыя «Арт-Лімуд Беларусь». Гэткая канфэрэнцыя адбываецца ўпершыню ў Беларусі. Яна зарганізаваная ў межах міжнароднага адукацыйнага праекту «Лімуд-СНД» для габрэйскай моладзі краін былога СССР.

Актывісты “Гавары праўду” зь Віцебску правялі падпісную кампанію пад патрабаваньнем да мясцовых уладаў даць справаздачу аб расходаваньні сродкаў гарадзкога бюджэту. Пад зваротам, адрасаваным у мясцовыя выканаўчыя ворганы ўлады “Хочам ведаць, куды ідуць нашы грошы!», падпісалася звыш зп пяцьдзясят чалавек.

Студэнтка Віцебскага дзяржаўнага мэдычнага ўнівэрсытэту Ганна Папкова адмовілася супрацоўнічаць з КДБ. Пра гэта яна распавяла ў аўтаінтэрвію і выклала відэа ў інтэрнэт. Супрацоўнік КДБ прыйшоў да дзяўчыны ва ўнівэрсытэт і паспрабаваў завербаваць. Ёй прапаноўвалася “стучаць” на чалавека, які мае дачыненьне, на думку КДБ, да выбуху ў Віцебску. Гаворка вядзецца пра выбух, які прагрымеў ля будынку КДБ у Віцебску 11 лістапада мінулага году. Ніхто не пацярпеў. У злачынстве абвінавачваецца 42-гадовая жанчына, жыхарка Віцебску.

Мэмарыяльная дошка ў гонар Мікалая Касьпяровіча — выбітнага беларускага навукоўца, які загінуў у жорнах сталінскіх рэпрэсіяў — была адкрытая ў Віцебску 21 траўня на будынку №4 па вуліцы Крылова. Дагэтуль Касьпяровіч ў Беларусі быў ушанаваны толькі самаробнай дошкай у вёсцы Ізабалёва Пухавіцкага раёну Менскай вобласьці, дзе ён нарадзіўся 21 траўня (паводле новаму стылю) 1900 году.

На цэнтральныя вуліцах Віцебску зьявіліся бела-блакітныя сьцяжкі з выявай фірмовай кветкі “Газпрому”. Гэтак Віцебск сустракае гасьцей грандыёзнага карпаратыву - газпромаўскага фэстывалю “Факел”, які пройдзе ў горадзе з 13 па 20 траўня. Як дома «газпромаўцы» павінны адчуць сябе яшчэ на віцебскім вакзале - Прывакзальная плошча літаральна патанае ў фірмовых колерах расейскай энэргетычнай кампаніі, а на будынку ёсьць буйныя плякаты мерапрыемства. Сьцяжкамі з сымболікай фэстывалю ўпрыгожаныя таксама вуліцы Кірава, Замкавая, Леніна і праспэкт Фрунзе. Дзе-нідзе гэтыя сьцяжкі нават зачынілі дарожныя знакі.

Праз 5 гадоў пасьля прапановы абласной адміністрацыі ўсталяваць у Віцебску помнік князю Альгерду раптам актывізавалася «расейская грамадзкасьць» — прынятае рашэньне зьвярнуцца да ўладаў, каб гэтага помніку не было. «Расейская грамадзкасьць», якая пратэстуе супраць усталяваньня помніку князю Альгерду — гэта «актывісты шэрагу арганізацыяў расейскіх суайчыньнікаў, прадстаўнікоў палітычных партыяў, казацтва, праваслаўнай грамадзкасьці і вэтэранаў вайны ў Афганістане», перадае агенцтва REGNUM.