Пасьля звароту бацькоў віцебскіх фігурыстаў у Адміністрацыю прэзыдэнта і публікацый у прэсе пра сытуацыю, якая склалася ў фігурным катаньні, Віцебск наведалі намесьнік міністра спорту і турызму Беларусі Аляксандар Барауля і старшыня Беларускага саюзу канькабежцаў Юлія Комлева. 5 сьнежня яны сустрэліся з бацькамі і трэнэрамі юных спартоўцаў.

У  Віцебску ёсьць свой ЦАР (цэнтар алімпійскага рэзэрву) зімовых відаў спорту і свой лядовы палац. Ёсьць свой хакей і свой шорт-трэк. А ёсьць фігурнае катаньне, якое юныя фігурысты хацелі б таксама называць “сваім”. Але зь нядаўніх часоў “сваё” і “наша” раптам сталася для іх чужым. У фігурным катаньні насьпявае бунт бацькоў…