Паводле выдання, у Беларусі зараз працягваецца самы яскравы і актыўны этап электаральнай кампаніі, падчас якога кандыдаты ў дэпутаты розных узроўняў распаўсюджваюць друкаваныя матэрыялы, праводзяць сустрэчы з выбаршчыкамі ў памяшканнях, арганізуюць масавыя мерапрыемствы, выступаюць у СМІ. Агітацыйны перыяд працягнецца да 24 лютага ўключна. Пра гэта піша сайт браслаўскай раённай газеты braslav-star.by.

На Пастаўскай выбарчай акрузе №29 вылучана тры кандыдаты, сярод іх важная персона - Ігар Сергяенка, кіраўнік адміністрацыі Лукашэнкі, якога, верагодна, і прызначаць у так званую палату прадстаўнікоў. Ён пазначаны як беспартыйны і ідзе ад працоўных калектываў.

Пасля рэгістрацыі канкурэнцыя скарацілася да 1,8 прэтэндэнта на мандат гарсавета, г.зн. у васьмі акругах у выбаршчыкаў пазбавілі права на альтэрнаціву. Паказальна, што без канкурэнцыі ў гарсавет сабраліся цяперашні яго старшыня Уладзімір Бялевіч і намеснік старшыні гарвыканкама Віктар Глушын. Ад мясцовых аддзяленняў партый вылучаны 33 кандыдаты ў дэпутаты (амаль 46% ад іх агульнай колькасці прэтэндэнтаў). На чарговы тэрмін гатовы абірацца дзесяць дзеючых дэпутатаў гарсавета.

Абласная газета «Витебские вести» апублікавала меркаванне Дзмітрыя Казака, дырэктара мясцовага філіяла  РУП «Белтэлекам» пра тое, што «каждый гражданин Беларуси должен принять участие в выборах – выполнить свой гражданский долг, понимая, что это реальная возможность обеспечить безопасность и мирное будущее страны». Было б цікава даведацца, што для ўсяго вышэй названага зрабіў асабіста Дзмітрый Казак – ён ужо практычна адпрацаваў цэлы дэпутацкі тэрмін у якасці намесніка старшыні Віцебскага гарсавета 28 склікання. А цяпер  хоча трапіць у абласны савет, балатуючыся па Віцебскай Пралетарскай акрузе №2 як вылучэнец ад Беларускай партыі «Белая Русь».

З 31 студзеня па 24 лютага ў Віцебскім рэгіёне будзе праходзіць перадвыбарчая агітацыя. Але ўжо зараз, у парушэнне выбарчага закону, некаторыя прэтэндэнты на крэсла дэпутата пачалі сваю агітацыйную кампанію ў СМІ. Першым у Віцебску выпадкам ускоснай агітацыі стала інтэрв'ю вайсковага камісара Віцебскай вобласці Руслана Шкодзіна, які збіраецца стаць дэпутатам у Палату прадстаўнікоў па Віцебскай-Чыгуначнай № 19 выбарчай акрузе. Інтэрв'ю з'явілася ў суботу, 20 студзеня, на сайце дзяржаўнага СМІ газеце "Віцьбічы", якое за суткі праглядзела больш за 1500 патэнцыйных выбаршчыкаў.

Аршанскі райвыканкам вызначыў 18 месцаў на тэрыторыі раёна, дзе кандыдатам у дэпутаты можна ладзіць сходы, мітынгі і пікеты. Два месцы для агітацыі – у самой Оршы, у іншых населеных пунктах – па адным, і ў асноўным гэта пляцоўкі перад установамі культуры. Полацкі райвыканкам прыняў досыць арыгінальнае рашэнне: канкрэтных месцаў не вызначана, і арганізатарам ёсць, з чаго выбраць. Тым болей, што цяпер не трэба вылічваць адлегласць ад месца правядзення імпрэзы да выканкамаў, вакзалаў, пастарункаў і гд.

Выступ аршанскага нараджэнца ў гарадскім палацы культуры быў анансаваны як «урок мужнасці» пад назовам «Зрабі слушны выбар!» А самога Талая прадставілі маладым людзям як матывацыйнага трэнера, паралімпійца, палітыка, прадпрымальніка, бацьку чацьвярых дзяцей, і «благотворителя», маючы на ўвазе ў тым ліку і ягоныя захады па незаконным перамяшчэнні ўкраінскіх дзяцей з часова акупаванай тэрыторыі Украіны, якія расследуецца паводле двух першых частак артыкулу 438 Крымінальнага кодэкса Украіны — парушэнне законаў і звычаяў вайны. За гэта Аляксею Талаю пагражае 15 гадоў або пажыццёвае зняволенне, але на сустрэчы з аршанскай моладдзю пра такі факт не згадалі.

Газета «Полацкі веснік» падрабязна асвяціла пікет па зборы подпісаў за вылучэнне спадарыні Адзінцовай, пыцытаваўшы словы маладой жыхаркі Полацка Валерыі Голубевай, удзельніцы Моладзевага парламента пры Полацкім райсавеце. «Сваёй працай у акрузе яна паказала сябе ініцыятыўным, неабыякавым да чужых бедаў дэпутатам і чалавекам, бо тржба мець вялікую адказнасць, каб прадстаўляць інтарэсы людзей і дапамагагаць ім у вырашэнні надзённых пытанняў. Упэўнена, што Святлана Уладзіміраўна і далей будзе працаваць на карысць і дзеля росквіту нашай краіны. І дакладна буду галасаваць за яе на выбарах», - кажа дзяўчына, якая ўжо спрычынілася да супрацы з уладнымі структурамі і не мае сумневаў нават у тым, што спадарыню Адзінцову абавязкова зарэгіструюць у якасці кандыдаткі.

Яшчэ напрыканцы кастрычніку рэдакцыя віцебскай дзяржгазеты "Віцьбічы" запусціла інфармацыйны відэапраект у YouTube "Азбука выбару", які прысвечаны выбарчай кампаніі па выбарах дэпутатаў у Віцебскім рэгіёне. За два месяцы існавання перадачы ў эфіры з'явіліся тры відэаролікі, якія набралі менш за сто праглядаў і не аднаго каментара. Пры гэтым канал “Навіны Віцебску. Віцьбічы” мае 10,8 тыс. падпісчыкаў.

На першых  старонках  раённых газет Віцебскай вобласці ды на іх сайтах фігуруе асоба Уладзіміра Андрэйчанкі, старшыні так званай палаты прадстаўнікоў. З большым запалам стараюцца ў гэтым накірунку докшыцкая і глыбоцкая раёнкі. Бо менавіта на гэтай акрузе ён балатуецца на так званых выбарах і яго прызначаюць у парламент. Аднак ініцыятыўную групу па збору подпісаў для вылучэння ў якасці кандыдата ў дэпутаты Палаты прадстаўнікоў Уладзімір Андрэйчанка не зарэгістраваў у Докшыцкай акруговай выбарчай камісіяй №22.