13-ю агульнанацыянальную дыктоўку, прысьвечаную Дню роднай мовы, напісалі 22 лютага больш за 50 віцяблян. Ці не ўпершыню ў такой імпрэзе ўзялі ўдзел чыноўнікі Віцебскага аблвыканкаму – начальнік упраўленьня культуры Пётар Падгурскі і кіраўнік галоўнага ўпраўленьня ідэалягічнай працы і па справах моладзі Генадзь Ягораў.

“Канцэрт Віктара Каліны ў залі філярмоніі на сёлета не заплянаваны”, – такі адказ з Віцебскай абласной філярмоніі атрымала на свой электронны зварот актывістка БХД Тацяна Севярынец. Ці выступіць Каліна на якой іншай пляцоўцы ў Віцебску, пакуль невядома.

Актывістка БХД Тацяна Севярынец абскардзіла адказ Віцебскага аблвыканкаму на калектыўны зварот аб перайменаваньні віцебскай “ленінкі” ў бібліятэку імя Васіля Быкава. Просіць міністэрства паспрыяць у вырашэньні гэтага пытаньня. Нагадаем, Віцебскі аблвыканкам адмовіўся нават разглядаць прапанову – праз “адсутнасьць адзінага падыходу”.

На пачатку красавіка быў абвешчаны збор подпісаў пад пэтыцыяй супраць усталяваньня ў Віцебску помніка княгіні Вользе. Аўтары калектыўнага звароту назвалі 7 прычын, чаму гэты помнік будзе недарэчным у абласным цэнтры. 17 траўня атрымалі адказ: падставаў, каб адмовіцца ад праекту, няма.

Нягледзячы на тое, што мясцовыя ўлады Віцебску забаранілі мітынгі ды шэсьце 25 сакавіка, апоўдні больш за сотню грамадзянаў выйшлі на плошчу Перамогі. Пасьля людзі прайшлі калёнай да помніку князю Альгерду, памятнай дошкі Васілю Быкаву і манумэнта Ўладзімеру Караткевічу, ушанаваўшы кветкамі гэтых знакавых асобаў беларускай нацыянальнай гісторыі.

22 сакавіка заяўнікі мітынгаў і шэсьця на Дзень Волі сябра КХП БНФ Ян Дзяржаўцаў і старшыня абласной арганізацыі партыі БНФ Кастусь Смолікаў сустрэліся з прадстаўнікамі гарадзкіх уладаў. Днём раней яны былі запрошаныя ў габінэт № 108 гарадзкога выканаўчага камітэту, у якім месьціцца аддзел па рабоце з зваротамі грамадзянаў і юрыдычных асобаў. Як  высьветлілася, на прафіляктычную гутарку.