Шматдзетная маці, жыхарка аграгарадку Ноўка, Вальтэр Валянціна Валянцінаўна пасьля пяці гадоў знаходжаньня ў сьпісах грамадзян, якія маюць патрэбу ў паляпшэньні жыльлёвых умоваў, ня толькі не атрымала ніякай кватэры, але яшчэ і была пазбаўленая права на атрыманьне льготнага крэдытаваньня як шматдзетная маці.

Арганізацыя працы саветаў грамадзкіх пунктаў аховы правапарадку з асобамі, якія вярнуліся зь месцаў пазбаўленьня волі, лячэбна-працоўных прафілякторыяў і вядуць асацыяльны лад жыцьця, асаблівасьці працаўладкаваньня гэтай катэгорыі грамадзян былі разгледжаныя на сэмінары-нарадзе са старшынямі саветаў ГПАП раёну і камандзірамі добраахвотных дружын на базе Ноўкінскага сельвыканкаму.

Месца пахаваньня савецкіх вайскоўцаў часоў Другой сусьветнай вайны сябрам партыі КХП БНФ Яну Дзяржаўцаву і Пятру Сарапеню паказала Секачова Людміла Сямёнаўна, жыхарка вёскі Казлы. Ва ўшанаваньне памяці пахаваных напрыканцы мінулага году партыйныя актывісты ўсталявалі драўляны крыж.

Віцебскі раённы выканаўчы камітэт, разгледзеўшы калектыўны зварот мясцовых актывістаў КХП-БНФ, паведаміў, што раскопкі, якія праводзіліся ў кастрычніку – лістападзе 2015 году ў лясным масіве каля вёскі Хайсы сіламі 52-га асобнага спэцыялізаванага пошукавага батальёну, не далі адназначнага адказу на пытаньне пра тое, хто, калі і пры якіх акалічнасьцях быў расстраляны і таемна пахаваны ў лесе.

Падчас будаўніцтва станцыі абезьзялезваньня каля Сялюцкага псыханэўралягічнага дому-інтэрнату для састарэлых і інвалідаў быў часткова раскапаны пагорак, на якім знаходзіцца гарадзішча V стагодзьдзя да н.э. — V стагодзьдзя н.э. Гарадзішча ёсьць культурна-гістарычнай каштоўнасьцю Беларусі 3-й катэгорыі.

Упраўленьнем Вярхоўнага камісара ААН па правох чалавека зарэгістраваны зварот у КПЧ жыхара вёскі Буяны Віцебскага раёну Леаніда Здрэстава. Актывіст вымушаны быў зьвярнуцца ў міжнародны орган па абарону пасьля таго, як улады адмовілі яму ў дазволе на правядзеньне пікету, а ўсе судовыя інстанцыі, у якіх ён спрабаваў быў абскардзіць гэтую адмову, – ад Кастрычніцкага райсуду Віцебску да Вярхоўнага Суду Рэспублікі Беларусь – сталі на бок уладаў.

У Віцебскім раёне яшчэ канчаткова ня вырашанае пытаньне з адловам безнаглядных жывёл у населеных пунктах. Спэцаўтабаза г. Віцебску, якая ажыцьцяўляе яго, ня ў стане задаволіць усе заяўкі, што паступілі ў сувязі з адсутнасьцю заключаных дамоваў непасрэдна зь сельскімі саветамі. Вось і атрымліваецца, што не гаспадары ў адказе за тых, каго яны прыручылі, а жыльлёва-камунальная і іншыя службы.

У Віцебскім раёне кошт паслуг па водазабесьпячэньні ў тры разы перавышае сярэднеабласны ўзровень, паведамілі ў Камітэце дзяржаўнага кантролю Віцебскай вобласьці.

На пачатку студзеня праваабаронца Пётар Іваноў зьвярнуўся да кіраўніка краіны з просьбай дапамагчы дворніку зь вёскі Буяны Віцебскага раёну Леаніду Здрэставу, які літаральна замярзаў у сваім доме.

Пасьля таго, як судзьдзя суду Віцебскага раёну Натальля Трацьцякова адмовіла Леаніду Здрэставу ў задавальненьні хадайніцтва аб допуску да ўдзелу ў судовым паседжаньні па грамадзянскай справе ў якасьці яго прадстаўніка праваабаронцы, ён зьвярнуўся ў Канстытуцыйны суд. Канстытуцыйны суд ня стаў вырашаць пытаньне, і цяпер актывіст просіць разабрацца ў сытуацыі старшыню Канстытуцыйнага суду.