Нагадаем, супрацоўнікі Кастрычніцкага РАУС праводзілі праверку па факце сьпеваў падчас супольнага пікету па зборы подпісаў за вылучэньне ў кандыдаты, што прайшоў 27 ліпеня. Актывісты – тады яшчэ прэтэндэнты на ўдзел у выбарах, а сёньня ўжо зарэгістраваныя кандыдаты – пад гітару прасьпявалі гімн «Магутны Божа» каля Летняга амфітэатру. Бард Георгі Станкевіч выканаў яшчэ і ўласную песьню «Сьцяг».
Усе трое тлумачылі, што пікеты па зборы подпісаў праводзіліся ў межах выбарчага заканадаўства, якое не забараняе розныя формы актыўнасьці, уключна са сьпевамі. Паводле ж рапарту намесьніка начальніка міліцыі грамадзкай бясьпекі, палкоўніка Ігара Скарыновіча, яны зладзілі несанкцыянаваную вулічную акцыю.
На памылкі ў рапарце, а таксама на бязьдзейнасьць міліцыі ў апісаных ім абставінах актывістка стваранай партыі БХД Алена Шабуня падала скаргу ў абласную міліцэйскую ўправу. З атрыманага адказу і вынікае, што скасаваная 11 жніўня адміністрацыйная справа ўжо адноўленая.
«Справу скасавалі, не знайшоўшы ў нашых дзеяньнях прыкметаў правапарушэньня. Але ж палкоўнік Скарыновіч іх заўважыў! І ў скарзе я адзначала, што ён мусіў спыніць нашы дзеяньні, калі лічыў іх правапарушэньнем, а не назіраць збоку… У адказе за подпісам начальніка абласной міліцэйскай управы генэрал-маёра Віктара Сянько гаворыцца, што нашае правапарушэньне было “непрацяглым па часе”, і што мы “самі разышліся, дык што ўмяшаньне міліцыі не спатрэбілася”. Адзначана, што фактычныя памылкі ў рапарце Скарыновіча “неістотныя”, але вось Кастрычнцкі райаддзел правёў праверку “няпоўна і без уліку ўсіх акалічнасьцяў”. Таму адміністрацыйную справу 23 жніўня абласная ўправа пастанавіла аднавіць».
Ніводзін з трох сьпевакоў афіцыйных папер пра аднаўленьне адміністрацыйнай справы пакуль не атрымаў. Між тым, і Алена Шабуня, і Тацьцяна Севярынец, і Георгі Станкевіч ужо зарэгістраваныя кандыдатамі ў дэпутаты парлямэнту. Яны не выключаюць, што аднаўленьне адміністрацыйнага перасьледу – гэта наўмысны ціск і дыскрэдытацыя.
