Кіраўніца аршанскага ідэалягічнага аддзелу ўбачыла ў арнамэнце бел-чырвона-белы сьцяг і загадала яго прыбраць
Гледачы канцэрту, прысьвечанага 85-м угодкам Уладзімера Караткевіча, магчыма, нічога і не заўважылі. Бо да самага пачатку іх не пускалі ў залю, пакуль мянялі афармленьне сцэны, адмыслова зробленае да юбілею пісьменьніка-земляка.
Суд палічыў законным будаўніцтва праваслаўнай царквы на запаведным возеры Балдук
Жыхары вакольных вёсак Вайшкуны і Станчыкі выступаюць супраць будаўніцтва, якое прынясе шкоду возеру. Але ні праваслаўная парафія райцэнтру Паставы, ні менскі фундатар, ні мясцовыя ўлады не захацелі слухаць іхных аргумэнтаў.
Андрэя Гайдукова пакаралі штрафам за пікет у памяць зьніклых палітыкаў
Памер штрафу склаў 18 базавых велічынь, або 8,1 мільёну рублёў. Такое спагнаньне накладзенае на наваполацкага актывіста аргкамітэту партыі БХД за акцыю салідарнасьці са зьніклымі дзеячамі апазыцыі, якую ён правёў 16 лістапада.
Праваабаронцу Паўлу Левінаву забаранілі пікетаваць
Пікеты, заяўкі на правядзеньне якіх Павал Левінаў падаваў у адміністрацыі Чыгуначнага і Першамайскага раёнаў Віцебску, мусілі прайсьці 10 сьнежня, у Міжнародны дзень правоў чалавека. Улады забаранілі іх, нягледзячы на тое, што працягласьць кожнай зь дзьвюх акцыяў, у адпаведнасьці з заяўкамі, складала б толькі... адну сэкунду.
Віцебскі праваабаронца змагаецца з дыскрымінацыяй у дачыненьні да дачнікаў
Праваабаронца Валер Місьнікаў ня змог дамагчыся ад дзяржавы справядлівай аплаты за спажытую энэргію для дачнікаў, якія пражываюць па-за горадам падчас дачнага сэзону.
Абсурд дня: прыхільнік творчасьці Ўладзімера Караткевіча заклікае да адзінства з Расеяй
26 лістапада беларусы адсьвяткавалі 85-я ўгодкі з дня народзін пісьменьніка Ўладзімера Караткевіча. Кожны, хто прыгадаў чарговую гадавіну, адзначаў яе па-свойму, але той пашаны і ўдзячнасьці, якой заслугоўвае Ўладзімер Сямёнавіч, ягоныя сваякі і прыхільнікі так і не дачакаліся.
У Воршы дыскутавалі на тэму сьмяротнага пакараньня
20 лістапада ў Воршы адбыўся паказ фільму «Шэсьць аргумэнтаў супраць сьмяротнага пакараньня», прэзэнтацыя кнігі «Сьмяротнае пакараньне ў Беларусі» і дыскусія на тэму «Сьмяротнае пакараньне – гэта забойства».
Мерапрыемства прайшло з удзелам каардынатара кампаніі «Праваабаронцы супраць сьмяротнага пакараньня» Андрэя Палуды, рэжысэра фільму Віктара Трацякова і ўкладальніцы кнігі – Паліны Сьцепаненкі.
Андрэй Палуда адзначыў: «Дыскусія прайшла на фоне вынясеньня новага сьмяротнага прысуду: у гэты дзень у Гародні вынесены прысуд Івану Куляшу. Дыскусія была вельмі гарачая. Падчас такіх сустрэчаў часта высьвятляецца, што некаторыя людзі папросту ня ведаюць, што сьмяротнае пакараньне існуе ў Беларусі. Падчас сустрэчы ў Воршы было шмат спрэчак, і гэта яшчэ адзін паказчык важнасьці тэмы. Такія сустрэчы ў рэгіёнах надзвычай цікавыя. На іх прыходзяць самыя розныя людзі – рознага ўзросту. Адчуваецца, што людзям часта не хапае інфармацыі па такой тэме, як сьмяротнае пакараньне».
Дыскусія адбылася ў межах ініцыятывы «Мы аршанцы, мы беларусы».
Крыніца: Радыё Рацыя
На “Шкловалакне” створаць агульную прафсаюзную камісію
На полацкам вытворчым аб’яднаньні “Полацак-Шкловалакно” ствараецца адзіная прафсаюзная камісія для падпісаньня калектыўнай дамовы з адміністрацыяй. Чальцы суполкі Свабоднага прафсаюзу, якая дзейнічае на прадпрыемстве, ужо вызначыліся з асобай, якая будзе іх прадстаўляць у гэтай камісіі.
Аршанцам прапанавалі самім зрабіць пераклады абвестак у транспарце на беларускую мову
Жыхарам Воршы, якія прасілі аднавіць абвяшчэньне прыпынкаў у аўтобусах на беларускай мове, кіраўніцтва аўтапарку даслала адказ. Сэнс адказу такі: «Беларускамоўныя абвесткі – ня наш клопат».
Справа «Аб пяці крыжох» раскрытая
Аддзел міліцыі Віцебскага раёну пастанавіў адмовіць актывісту партыі КХП БНФ Яну Дзяржаўцаву ў распачынаньні крымінальнай справы па факце зьнікненьня пяці крыжоў, усталяваных у лесе паблізу вёскі Хайсы на меркаваным месцы расстрэлаў грамадзян падчас палітычных рэпрэсіяў у 30-х - 40-х гадох мінулага стагодзьдзя.