Яшчэ ў верасні 2021 года праваабаронца Павел Левінаў звярнуўся ў Генеральную пракуратуру краіны з заявай аб нелегальнай міграцыі замежных грамадзян у напрамку краін Еўрапейскага Саюза. Але ні ў пракуратуры, ні ў пагранкамітэце існуючую сітуацыю на граніцы не разглядаюць у рамках дзеючага крымінальнага заканадаўства.

З другой паловы кастрычніка ў Віцебску пачаў працаваць «COVID-патруль», у межах якога валанцёры БРСМ публічна нагадваюць жыхарам гораду аб важных мерах прафілактыкі каранавірусной інфекцыі. Але, па прызнанні ўдзельнікаў акцыі, сярод іх практычна адсутнічаюць прышчэпленыя ад гэтай хваробы.

Міліцыя працягвае паведамляць пра затрыманні і завядзенні крымінальных справаў у дачыненні грамадзян, якія нібыта прынізілі гонар і годнасць чыноўнікаў і прадстаўнікоў праваахоўных органаў. Такіх «ідэнтыфікаваных» людзей у Віцебскай вобласці даволі шмат, што сведчыць аб тым, што пратэставыя настроі ў грамадстве нікуды не зніклі і не знікнуць у бліжэйшы час.

22 кастрычніка суд Кастрычніцкага раёну Віцебску разгледзеў адміністрацыйную справу ў дачыненні да 39-гадовага супрацоўніка транспартнай інспекцыі Юрыя Шылько. Яго абвінавацілі ва ўдзеле ў несанкцыянаваным масавым мерапрыемстве – пікетаванні (ч.1 арт. 24.23 КаАП). Інспектара затрымалі падчас нясення службы – трое сутак ён правёў за кратамі. Прычынай затрымання сталася пратэставая налепка на бамперы ягонага аўто. На судзе Юрый Шылько заявіў, што гэта была правакацыя...

13 кастрычніка на полацкага старшыню кантрольна-рэвізійнай камісіі Свабоднага прафсаюзу Беларускага (СПБ) Віктара Стукава супрацоўнік Полацкага РАУС Віктар Кураш склаў пратакол аб адміністрацыйным правапарушэнні. На думку міліцыі, Стукаў распаўсюджваў у інтэрнэце экстрэмісцкія матэрыялы. Абвінавачанні яму выставілі завочна, бо меркаваны правапарушальнік у аддзяленне міліцыі для складання пратаколу не прыйшоў.

У судзе Віцебскага раёну 21 кастрычніка пачаўся разгляд крымінальнай справы ў дачыненні 63-гадовага мясцовага прадпрымальніка Уладзіміра Мунякіна, вядомага сваімі напаўфантастычнымі пражэктамі. Яго абвінавачваюць у махлярстве ў асабліва буйным памеры (ч.4 арт. 209 КК). Па версіі следства, Мунякін прысабечыў больш за 147 тысяч рублёў грамадзян. Але зацікавіліся ім толькі пасля палітычных заяваў. Цяпер яму пагражае да 10 гадоў пазбаўлення волі.

Выйшаў на волю палітвязень Дзмітры Фурманаў, які праходзіў у «справе Ціханоўскага». Палітвязень вызваліўся з папраўчай калоніі №3, якая знаходзіцца ў пасёлку Віцьба Віцебскага раёну. Ён быў затрыманы ў канцы траўня 2020 году ў Горадні і асуджаны да двух гадоў калоніі. У тэрмін адбывання пакарання быў залічаны час, праведзены ў СІЗА, перадае Радыё Свабода.

Лёс асуджанага да вышэйшай меры пакарання Віктара Паўлава, ад якога больш за 6 месяцаў няма ніякіх звестак, пакуль застаецца нявысветленым. Першы намеснік начальніка Дэпартаменту па выкананні пакаранняў МУС РБ Іван Мысліцкі ўхіліўся адказаць па сутнасці на заяву праваабаронцы Паўла Левінава аб знікненні асуджанага да расстрэлу.

19 кастрычніка следчы камітэт дапытаў аршанскага праваабаронцу і рэдактара парталу Orsha.eu Ігара Казмерчака. Са словаў актывіста, яго дапытвалі ў якасці сведкі ў «справе праваабарончага цэнтру «Вясна». Вярнулі банкаўскія карткі, адабраныя падчас колішніх ператрусаў.

У судзе Полацка і Полацкага раёна 14 кастрычніка пачаўся разгляд крымінальнай справы ў дачыненні да 52-гадовай прадаўшчыцы Зухры Берасневай, якая абвінавачваецца адразу па трох артыкулах Крымінальнага кодэкса: абраза прадстаўніка ўлады (арт. 369 КК), гвалт альбо пагроза ўжывання гвалту ў дачыненні да супрацоўніка органаў унутраных спраў (арт. 364 КК) і паклёп (арт.188 КК РБ).