Судзьдзя Кастрычніцкага раёну Віцебску Вікторыя Лешчанка забараніла прафсаюзнаму юрысту Валеру Місьнікаву і рэгіянальнаму прадстаўніку прафсаюзу РЭП Георгію Разумаву прадстаўляць у судзе інтарэсы сябра прафсаюзу Алены Шандзюковай. Юрыдычна непісьменная жанчына засталася сам-насам з судзьдзёй і трыма адвакатамі юрыдычнай кансультацыі № 2, супраць якой яна падала пазоў.

Беларускі прафсаюз работнікаў радыёэлектроннай прамысловасьці ў інтарэсах сябра прафсаюзу юрыста Валера Місьнікава і яго дачкі Тацьцяны Місьнікавай зьвярнуўся ў суд з грамадзянскім пазовам супраць «Белдзяржстраху». Аднак судзьдзя Чыгуначнага райсуду Віцебску Сьвятлана Варатынская вырашыла справу не на карысьць пазоўніка: згодна зь яе пастановай згаданае дзяржаўнае страхавое прадпрыемства можа не выконваць свае забавязаньні па доўгатэрміновым страхаваньні 1991 году.