Намесьнік дырэктара па ідэалёгіі ААТ «Полацак-Шкловалакно» Андрэй Кузьмін накіраваў у міліцыю заяву з абвінавачваньнем актывіста Свабоднага прафсаюзу Беларускага Віктара Стукава ў паклёпе і абразах у інтэрнэце. Аднак дамагчыся прыцягненьня прафсаюзнага лідэра да адказнасьці не атрымалася – крымінальная справа паводле заявы распачатая не была.

У кастрычніку полацкую міліцыю зноў зацікавілі асобы мясцовых лідэраў Свабоднага прафсаюзу Беларускага Віктара Стукава і Мікалая Шараха. Іх па чарзе настойліва пачалі запрашаць на гутарку ў РАУС. Праз хваробу Стукаў не пайшоў, а Шарах схадзіў, каб даведацца прычыну. Высьветлілася, што на іх паскардзіўся намесьнік дырэктара па ідэалёгіі Полацкага аб'яднаньня «Шкловалакно» Андрэй Кузьмін.