Аляксей Мілюкоў, сын вядомага бабруйскага блогера Алега Жалнова, з 2014 году адбывае пакараньне ў выглядзе абмежаваньня волі. Спачатку яго накіравалі ў Гомель, а ў жніўні 2015 году перавялі ў Наваполацкую папраўчую ўстанову адкрытага тыпу № 15. Цяпер Наваполацкі гарадзкі суд прыняў рашэньне адправіць яго ў закрытую турму.

Сябру БСДП Аляксею Жалнову-Мілюкову 29 чэрвеня наваполацкі сьледчы Аляксей Збароўскі прад'явіў абвінавачаньне ва ўхіленьні ад пакараньня (артыкул 415 КК). Апазыцыйныя партыйныя актывісты лічаць, што Аляксея перасьледуюць за яго актыўную абарону сваіх правоў і за грамадзкую дзейнасьць яго бацькі Алега Жалнова, які зьбіраецца вылучацца кандыдатам у дэпутаты Палаты прадстаўнікоў.