У нядзелю 31 траўня ў цэнтры Віцебску прайшлі чарговыя пікеты для збору подпісаў прэтэндэнтаў у кандыдаты на прэзыдэнцтва. Да столікаў, дзе зьбіралі подпісы за Сьвятлану Ціханоўскую, віцябляне ўтварылі чаргу на некалькі сотняў мэтраў.

У Віцебску працягваюцца суды над прыхільнікамі блогера Сяргея Ціханоўскага. 29 траўня суд Кастрычніцкага раёну Віцебску аштрафаваў на 30 базавых велічынь адміністратарку Тэлеграм-каналу «Краіна для жыцьця» Юлію Барсукову ўсяго за адно паведамленьне ў чаце. Актывіст Аляксандар Ільінец быў пакараны штрафам у памеры 25 базавых велічынь за ўдзел у сустрэчы зь Ціханоўскім 30 красавіка.

Віцебскі праваабаронца Павал Левінаў лічыць, што падчас фармаваньня Віцебскай абласной выбарчай камісіі мела месца дыскрымінацыя: старшыня абласнога савету Уладзімер Цярэнцьеў кепска азваўся пра яго, выступаючы перад прысутнымі, паведамляе Беларускае Радыё Рацыя.

Віцябляніна Аляксея Саламаненку затрымалі 26 траўня на працы і пасьля складаньня пратаколу адразу зьмясьцілі ў ізалятар часовага ўтрыманьня (ІЧУ), дзе ён правёў суткі да суду. У сераду 27 траўня ягоную справу разглядаў суд Першамайскага раёну Віцебску. Прысуд аказаўся мякчэйшы, чым чакалі: 25 базавых велічынь – за сустрэчу з блогерам Ціханоўскім.

«Ад 29 красавіка я на шэсьць месяцаў зьмешчаны ў «крытку», таму магу свабодна і стабільна перапісвацца», – паведаміў у чарговым лісьце праваабаронцу Леаніду Сьвеціку палітвязень Міхаіл Жамчужны, які знаходзіцца зараз у горацкай калёніі. «Крыткай» там называюць памяшканьне камэрнага тыпу (ПКТ).

У Віцебску 25 траўня дзьве ініцыятыўныя групы прэтэндэнтаў у кандыдаты на прэзыдэнцтва пачалі зьбіраць подпісы выбарцаў на пікетах, якія ладзілі на плошчы каля піраміды ТЦ «Марка-сіці». Подпісы можна было пакінуць за Сяргея Чэрачня («Чэ») і Сьвятлану Ціханоўскую – жонку блогера «Краіны для жыцьця» Сяргея Ціханоўскага.

У судзе Чыгуначнага раёну Віцебска да 10 сутак арышту асуджаны актывіст Аляксей Прохараў. Працэс адбываўся праз Skype, бо з 22-га траўня віцяблянін знаходзіцца ў ізалятары часовага ўтрымання (ІЧУ), паведамляе Беларускае Радыё Рацыя. Справу разглядала судзьдзя Алена Цыганкова.

25 траўня ў судзе Чыгуначнага раёну Віцебску судзьдзя Юры Урбан разгледзеў адміністрацыйную справу ў дачыненьні да віцяблянкі Дар'і Юрчанка. Дзяўчыну прызналі вінаватай ва ўдзеле ў несанкцыянаваным масавым мерапрыемстве (ч.1 арт. 23.34 КаАП) і аштрафавалі на 25 базавых велічыняў.

Падпалкоўнік паліцыі РФ у адстаўцы Андрэй Новікаў, які жыве зь сям’ёй у Пастаўскім раёне, накіраваў 22 траўня ў Віцебскі абласны суд скаргу на рашэньне Пастаўскага райсуду, што аштрафаваў яго на 810 рублёў за інтэрвію блогеру Ціханоўскаму. Суд палічыў гэта ўдзелам у несанкцыянаваным пікетаваньні (арт. 23.34 КаАП).

22 траўня ў Віцебскі абласны суд разгледзеў касацыйную скаргу глыбоцкага журналіста-фрылянсэра Зьмітра Лупача на пастанову суду ніжэйшай інстанцыі. Скаргу разглядала судзьдзя Сьвятлана Іванова. У выніку яна пакінула пастанову Глыбоцкага суду бязь зьменаў, а скаргу без задавальненьня.